PolyU, Social Sciences, Sophie

 呢四個月，我學到嘅唔止係教書

喺 Link-education 實習咗四個月，呢段日子對我嚟講，真係一場意料之外嘅冒險。當初揀嚟呢度，主要係因為我對 SEN（特殊教育需要）嘅議題好感興趣，想親身接觸吓呢班小朋友。雖然呢段時間因為季節關係，實際觀察 SEN 堂嘅機會唔算多，大部分時間都係幫手做 Weekly Planner、出 GCSE 考卷同埋做課堂觀察，同我原本預期嘅有啲落差，甚至係我完全冇讀過嘅教育範疇，但呢啲「跨界」嘅挑戰，反而令我學到更多嘢。

其實我好認同一個說法：唔需要相關背景，反而代表有更多嘢可以學。

一開始真係幾大壓力，因為我腦入面只有心理學嗰啲發展階段理論，例如 Erik Erikson 嗰套。為咗追返進度，我唯有自學，去搵啲幼教書睇，又成日請教同事 Vickie，佢有幼教背景，幫咗我好多。最令我有感觸嘅係用公司提供嘅 AI 工具。AI 確實好方便，資料庫又大，幫我解決咗好多工作上嘅難題；但慢慢我發現，如果只係依賴佢生成結果，我自己根本學唔到嘢。所以我後來迫自己：「一定要先自己諗咗個方案出嚟，之後先用 AI 去優化同畀 Feedback。」 咁樣做，啲經驗先至真正入到我腦。

喺呢段時間，我發現自己嘅美術同電腦底子竟然幫到手。有時為咗搵張準確啲嘅圖或者排好個試卷格式，我會喺 Irasutoya 搵素材，搵唔到甚至會親自落手畫。見到自己畫嘅圖可以令份教材更專業、令成件事行得更順，嗰種滿足感係好大嘅。

關於「溝通」，我都交咗唔少學費。我以前習慣講嘢好詳細、解釋得好長，覺得咁樣至係清清楚楚。但原來喺職場，講得太冗長反而令人難捉重點。我學識咗：人哋問到先講，唔好過度描述，要學識精簡。 仲有，自信心真係好重要。如果你表現得唔夠 Confidence，就算你份 Project 做咗三日三夜，人哋都會覺得你未 Ready；相反，只要你表現得淡定，溝通起嚟都會順暢好多。就算真係做錯咗，保持 Chill 嘅心態去面對同修正，先至係專業。

實習仲令我睇到「理論」同「實際」嘅分別。例如以前讀書知小朋友有「自我中心主義（Egocentrism）」，但原來喺現實中，呢樣嘢會直接影響你嘅教材。好似玩「老狼老狼幾點鐘」咁，你一定要將 midnight 改做 9 點鐘，因為喺小朋友嘅世界，9 點就係佢哋瞓覺嘅時間。如果你唔改，佢哋會因為「自我中心」而同你拗到底。所以，設計活動之前，一定要先了解佢哋嘅生活細節。

另外，我觀察到小朋友真係有「萬物有靈論（Animism）」，佢哋覺得所有嘢都有生命；而且佢哋學數理好依賴實物操作，如果冇得畀佢哋摸、畀佢哋睇住 2+5 點樣變做 7，佢哋係好難理解嘅。睇返以前啲教學錄影，再對照返書本學過嘅理論，嗰種「原來係咁！」嘅感覺真係好特別。

當然，呢四個月亦令我睇清楚自己嘅缺點。我發現自己係一個極度完美主義者，而且時間管理（Time Management）做得好差。為咗將一件工作做到最好，我成日加班，甚至搞到學校有三份 Assignment Overdue。呢件事反映出我好缺乏管理能力，唔識攞個平衡。

我問同事點樣平衡工作同生活，佢哋畀咗個好簡單嘅答案我：「每一件工作都要有 Deadline，時間到咗，如果真係做唔完就要學識放手。」 唔係叫我唔好盡力，而係要跟住 Schedule 行。再加埋呢段時間屋企有啲事要處理，令我成日諗緊將來應該繼續讀書定係出嚟社會做嘢，呢啲掙扎其實都幾辛苦。

總結呢四個月，雖然有迷惘、有壓力，但我睇到自己熱情、肯學同埋可靠嘅一面。呢份實習唔單止係一份工，更加係一個令我重新認識自己、由學生轉變成職場人嘅必經過程。雖然未來仲有好多 Dilemma（兩難），但我相信呢啲經驗會令我行得更穩。