CityU, Bachelor of Social Sciences (Psychology Major), Kary

 從課室踏進世界

係共融教室度過六個禮拜嘅實習之後，雖然時間唔長，但係都令我得着唔少。我學到嘅，唔單止係點樣實際應用係課堂上學過嘅嘢，亦都喺呢嗰過程中學到自己嘅優點同缺點；令我更加清楚我未來應該要向咩嘅方向發展去好好善用我嘅技巧，同埋應該要去彌補啲咩嘅不足。

作為一個主修係心理學嘅學生，我發現其實好多心理學嘅理論，雖然唔會直接可以應用到，但係只要細心啲噉留意嘅話，其實係會發現同日常生活息息相關。負責AI 工作坊嘅時候，我當初其實有啲失望，以為唔會有機會實踐到我係堂上面學過嘅嘢，但係實際做嘅時候，我發現我其實做嘅嘢都可以係同心理學息息相關嘅，只係轉咗一個角度去應用。例如喺設計Powerpoint嘅時候，用圖片同埋鮮艷嘅顏色去吸引注意力；或者係如果將一個idea分成唔同顏色去分類嘅話，會比較易明，更加幫助記憶更加深刻。不過除此之外，更重要嘅喺透過訪問唔同嘅同事，導師嘅時候，令我重新思考AI係教學上嘅角色。因為AI 工作坊嘅主要對象係導師，包括嘅材料都係針對教育，出發點都係「AI點樣吸引同埋幫到小朋友」。我發現AI可以幫助到導師嘅點，唔單止係生成教案同埋Powerpoint，但係可以衡量程度適唔適合小朋友，同埋點樣令教材更加方便SEN嘅小朋友，例如係語音轉文本，同生成多感官教材。呢啲點子都係透過訪問導師，同事先可以實際知道佢哋日常工作嘅困難，同埋佢哋所着重嘅嘢，噉樣先可以令工作坊學得嘅技巧對佢哋日後工作有用，更加順暢。呢一個過程其實都係考驗緊我對SEN嘅需求嘅認知，同埋一啲可以幫助佢哋嘅方法，所以我除咗實踐緊課堂上學過嘅嘢之餘，亦都持續學習緊一啲新穎嘅方法同吸收唔同嘅經驗，去由SEN教學嘅角度去睇AI。

認識要對應唔同受眾嘅重要，其實都係我喺今次實習中學到嘅嘢。 我另外負責制作中秋節嘅活動小冊子同埋月餅嘅製作方法；小遊戲，版面設計都係要吸引小朋友同埋家長，初初對我來講，因為冇咩概念小朋友會俾咩吸引，所以覺得難以捉摸，得特別難以觸摸。好在有Henry 同埋 Jojo 嘅悉心引導同埋建議，最後可以成功完成到呢個project，而且令我喺未來對設計類似嘅嘢嘅時候更加有把握。

仲有嘅係，係呢個實習過程當中，我可以訓練我收集資料，同埋解難嘅技巧；除咗爲AI工作坊收集關於AI model 嘅資料之外，我都好感激有機會係「從聲到字」可以讓我訓練做literature review 嘅技巧，去應用行爲心理學嘅理論，例如自我決定理論，同埋一啲操作制約嘅方法去幫助小朋友培養寫中文字嘅習慣，加深佢哋對拼音嘅記憶。係生成端午節龍舟需要嘅AI 圖片嘅時候，有一個難題就係AI生成唔到將飲管穿入窿嘅圖，穿嘅方法唔合邏輯，或者係直接放係窿嘅上面，令我不知所措。但係最後唔係一直同AI Model糾纏，而係用最原始，直接修圖嘅方法解決，噉樣嘅種種情況都可以訓練我嘅解難能力。

最後，係實習期間嘅唔同task，可以令我從做唔同範疇嘅task嘅時候感覺到我嘅長處同短處。喺收集資料，關於文字，設計版面上嘅task上，我似乎會做得比較舒服一啲；相比一啲要對人，要演講，開口問嘅時候，我發現我自己會比較容易緊張，不知所措。呢啲經驗除咗可以令我更加認識自己嘅界限之外，亦都令我知道我可以從咩嘅方向發展，去善用我收集資料嘅能力，同埋要多多練習說話技巧，將勤補拙。

總括而言，雖然今次好遺憾地冇得入校，實際感受課室環景，我係實習期間都得着唔少，好榮幸可以係共融教室同埋Global Kids體驗職場嘅環境，將我係課室入面所學到嘅應用喺現實情況入面；亦都好多謝同事同埋intern對我嘅種種包容同埋耐性，令我可以從我嘅錯誤中學習。希望我可以係未來應用到係呢到所學到嘅技巧，繼續磨練自己。